ព្យុះហាយយ៉ាន់នឹងបោកបក់លើខ្ពង់រាបខាងជើង និងឦសានកម្ពុជា
Friday, 08 November 2013ឃុត សុភចរិយា
ភ្នំពេញ ប៉ុស្តិ៍
ភ្លៀងធ្លាក់ខ្លាំង នៅរាជធានីភ្នំពេញ កាលពីម្សិលមិញ។ រូបថត ហុង មិនា
សេចក្ដីជូនដំណឹងនោះ លោក លឹម គានហោ រដ្ឋមន្ត្រីក្រសួងធនធានទឹក និង ឧតុនិយម បានព្យាករណ៍ថា ព្យុះទី៣០ ឈ្មោះហាយយ៉ាន់ (HAIYAN) ដែលបានវាយប្រហារលើប្រទេសហ្វីលីពីន កំពុងធ្វើដំណើរមកកាន់តំបន់ឆ្នេរប្រទេសវៀតណាមភាគកណ្ដាល។
តាមការព្យាករណ៍របស់លោក ព្យុះនេះនឹងមកដល់តំបន់ឆ្នេរប្រទេសវៀតណាមភាគកណ្ដាលនៅយប់ថ្ងៃ ទី១០ ខែវិច្ឆិកា ឆ្នាំ ២០១៣។ ពេលព្យុះនេះមកដល់នឹងគ្របដណ្ដប់លើតំបន់ឆ្នេរប្រទេសវៀតណាមភាគ កណ្ដាលហើយនោះ វានឹងធ្វើឲ្យតំបន់ខ្ពង់រាបភាគខាងជើង និងខ្ពង់រាបភាគឦសានប្រទេសកម្ពុជា ដែលរួមមាន ខេត្តឧត្តរមានជ័យ ព្រះវិហារ រតនគីរី មណ្ឌលគិរី ស្ទឹងត្រែង នឹងខេត្តក្រចេះ មានភ្លៀងធ្លាក់ពីមធ្យមទៅច្រើន នឹងមានខ្យល់កន្ត្រាក់បោកបក់ខ្លាំងមកជាមួយផង ចាប់ពីថ្ងៃទី១០ ដល់ថ្ងៃទី១១ ខែវិច្ឆិកា ឆ្នាំ ២០១៣។
ដោយឡែកនៅថ្ងៃសុក្រនេះ វិសម្ពាធថ្មីមួយទៀត នឹងធ្វើដំណើរឆ្លងកាត់លើផ្ទៃសមុទ្រជ្រោយឥណ្ឌូចិន ដែលស្ថានភាពបាតុភូតអាកាសធាតុទាំងពីរ ខាងលើ នឹងធ្វើឲ្យខេត្តមួយចំនួន នៅតំបន់ទំនាបកណ្ដាល និងតំបន់ឆ្នេរកម្ពុជា មានភ្លៀងធ្លាក់ពីមធ្យមទៅច្រើន និងធ្វើឲ្យរលកសមុទ្រមានកម្ពស់ពី ១ ម៉ែត្រទៅ ២ ម៉ែត្រ ចាប់ពីថ្ងៃ ទី០៥ ដល់ ទី០៩ ខែ វិច្ឆិកា ស្អែកនេះ។
កាលពីរំលងអធ្រាត្រចូលថ្ងៃទី ៨ វិច្ឆិកានេះ មានសេចក្តីរាយការណ៍ពីខេត្តពោធិ៍សាត់ ថាលំនៅឋាន និងអគាររដ្ឋបាលសាធារណៈរបស់រដ្ឋ សរុបជាង ៤០០ ខ្នង នៅស្រុកក្រគរ បានរងការលិចលង់ដោយសារទឹកហូរបុកយ៉ាងគ្រហុកពីលើភ្នំ និងតំបន់ច្រកល្អៀង។
ថ្មីៗកន្លងមកនេះប្រទេសកម្ពុជា បានទទួលរងផលប៉ះពាល់យ៉ាងខ្លាំង ពីឥទ្ធិពលនៃប្រព័ន្ធវិសម្ពាធទាប ដែលជាផ្នែកមួយនៃការបំម្រែបំម្រួលអាកាសធាតុ។
យោងតាមរបាយការណ៍របស់គណៈកម្មាធិការជាតិគ្រប់គ្រងការប្រែប្រួល អាកាសធាតុ បានបង្ហាញថា គ្រោះទឹកជំនន់នៅឆ្នាំនេះ បានបង្កការខាតបង់ទ្រព្យសម្បត្តិ និងហេដ្ឋារចនាសម្ព័ន្ធនានាសរុបជាទឹកប្រាក់ ប្រមាណ ៨០០ លានដុល្លារអាមេរិក និងបង្ករឲ្យមនុស្ស ១៦៨ នាក់ស្លាប់ ហើយប្រជាជនជាង ១,៨ លាននាក់ រងផលប៉ះពាល់ និងខូចខាតដំណាំស្រូវប្រមាណជាង ៣០ ម៉ឺនហិកតា។
No comments:
Post a Comment