CNRP បញ្ជាក់ជំហរថា ការចូលប្រជុំសភាបាន លុះត្រាតែមានបោះឆ្នោតឡើងវិញ
ដោយ៖ ឡាយ សាមានថ្ងៃព្រហស្បតិ៍ ទី16 ខែមករា ឆ្នាំ2014
http://vodhotnews.com
មេដឹកនាំគណបក្សសង្គ្រោះជាតិ បញ្ជាក់ជំហរថា បេក្ខជនជាប់ឆ្នោតជាតំណាងរាស្ត្រនៃគណបក្សសង្គ្រោះជាតិ អាចចូលសភាប្រជុំបាន លុះណាតែមានកំណែទម្រង់ប្រព័ន្ធបោះឆ្នោតជាមុនសិន ដើម្បីបោះឆ្នោតឡើងវិញនៅក្នុងអាណត្តិ ។
នេះជាការឆ្លើយតបទៅលោកនាយករដ្ឋមន្ត្រី ហ៊ុន សែន កាលពីថ្ងៃពុធ ដែលបានស្នើឲ្យអ្នករាយការណ៍ពិសេសអង្គការសហប្រជាជាតិទទួលបន្ទុក សិទ្ធិមនុស្ស លោក សុរិយា ស៊ូប៊ែឌីជួយជំរុញឲ្យតំណាងរាស្ត្រគណបក្សសង្គ្រោះជាតិ ចូលសភាជាមុនសិនដើម្បីឈានដល់ការទម្លាយភាពទាល់ច្រកនានា។
លោក សម រង្ស៊ី បានសរសេរនៅលើហ្វេសប៊ុករបស់លោកថា គណបក្សសង្គ្រោះជាតិ ស្វាគមន៍តួនាទីរបស់អង្គការសហប្រជាជាតិ ដើម្បីដោះស្រាយវិបត្តិនយោបាយ ក្រោយការបោះឆ្នោត។ លោកបញ្ជាក់ថា «ប៉ុន្តែ ការចូលរួមប្រជុំរដ្ឋសភាអាចធ្វើទៅបាន លុះត្រាតែមានការធានាឲ្យមានការកែទម្រង់ប្រព័ន្ធ បោះឆ្នោត(មុនគេផ្លាស់ គ.ជ.ប.) ដើម្បីឈានទៅរកការបោះឆ្នោតឡើងវិញក្នុងពេលឆាប់ៗនេះ»។
បន្ថែមពីនេះ អនុប្រធានគណបក្សសង្គ្រោះជាតិ លោក កឹម សុខា បានជម្រាបទៅលោក ហ៊ុន សែន តាមរយៈលោក សុរិយា ស៊ូប៊ែឌីថា បេក្ខជនជាប់ឆ្នោតគណបក្សសង្គ្រោះជាតិ អាចចូលសភាបាន ប៉ុន្តែចូលដើម្បីរៀបចំប្រព័ន្ធបោះឆ្នោតឡើងវិញ។
នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជាហៅកាត់ និកហ្វិច( Nicfec) លោក ហង្ស ពុទ្ធា យល់ថាគណបក្សទាំងពីរនៅតែប្រកាន់ជំហររឹងត្អឹងរៀងៗខ្លួន។ តែលោក ស្នើឲ្យគណបក្សទាំងពីរ យន្តការរបស់អ្នករាយការណ៍ពិសេសអង្គការសហប្រជាជាតិ ដើម្បីគិតប្រយោជន៍ជាតិជាធំ។
VOD មិនទាន់អាចសុំការឆ្លើយតបពីក្រុមមន្ត្រីជាន់ខ្ពស់គណបក្សប្រជាជនកម្ពុជាបាននៅឡើយ។
ប៉ុន្តែអ្នកជំនាញខាងការបោះឆ្នោត ធា្លប់លើកឡើងថា ការបោះឆ្នោតឡើងវិញ ក្នុងអាណត្តិអាចធ្វើទៅ បានក្នុងរយៈ ពេល២ឆ្នាំពោលនៅឆ្នាំ២០១៥៕
សូមសរសេរមកកាន់ លោក ឡាយ សាមាន តាមរយៈ samean@vodhotnews.com
No comments:
Post a Comment