Thursday, 20 June 2013
សេត គឹមសឿនភ្នំពេញ ប៉ុស្តិ៍
មកទល់បច្ចុប្បន្ននេះ ភាពជាដៃគូយុទ្ធសាស្ត្ររវាង អង្គការយូណេស្កូ (UNE-SCO) និងក្រុមហ៊ុន Panasonic នេះបានអនុវត្តគម្រោងកម្មវិធីសិក្សាអេកូបេតិកភណ្ឌពិភពលោករបស់ពួកគេ នៅជាង១០តំបន់នៃសម្បត្តិបេតិកភណ្ឌពិភពលោក ហើយនៅឆ្នាំ២០១៣នេះ ខណៈដែលប្រទេសកម្ពុជាគឺជាម្ចាស់ផ្ទះនៃកិច្ចប្រជុំសម្បត្តិ បេតិកភណ្ឌពិភពលោកនេះ គម្រោងនឹងយកចិត្តទុកដាក់ជាសកលស្តីពីប្រាសាទអង្គរវត្តកម្ពុជា និងតំបន់មួយចំនួននៅក្នុងប្រទេស៧ផ្សេងទៀតដែលក្នុងនោះរួមមាន ប្រទេសចិន និងប្រទេសអេស្ប៉ាញផងដែរ។
នៅក្នុងដំណើរទស្សនកិច្ច និងបង្ហាញពីលទ្ធផលនៃការជួយជ្រោមជ្រែងរបស់អង្គការយូណេស្កូនៅ ខេត្តសៀមរាប លោក Filip De Lan នាយការិយាល័យផ្នែកវប្បធម៌របស់អង្គការយូណេស្កូប្រចាំនៅកម្ពុជាបាន មានប្រសាសន៍ថា៖«នៅក្នុងភាពជាដៃគូ Panasonic បានរៀបចំសហការគ្នាជាមួយនឹងទូរទស្សន៍ National Geographic ធ្វើជាឯកសារពាក់ព័ន្ធនឹងសម្បត្តិបេតិកភណ្ឌនានាសម្រាប់ចាក់ផ្សាយ ចំនួន១៩៣ប្រទេសលើពិភពលោក ហើយចុងឆ្នាំ២០១៣នេះ នឹងធ្វើការចាក់ផ្សាយជាថ្មីម្តងទៀត ដែលប្រាសាទអង្គរវត្តកម្ពុជានឹងត្រូវស្ថិតក្រោមការយកចិត្តទុកដាក់ ខ្ពស់»។
គួរបញ្ជាក់ថា ភាពជាដៃគូយុទ្ធសាស្ត្ររវាងអង្គការយូណេស្កូ( UNESCO) និងក្រុមហ៊ុន Panasonic ដើម្បីអប់រំ និងការយល់ដឹងលើសារៈសំខាន់ និងតម្លៃនៃតំបន់បេតិកភណ្ឌនេះត្រូវបានចាប់ផ្តើមក្នុងឆ្នាំ២០១១។ នៅក្នុងការងារនេះក្រុមហ៊ុនPanasonic នឹងផ្គត់ផ្គង់សម្ភារបរិក្ខារសោតទស្សន៍ទៅទីស្នាក់ការកណ្តាលរបស់ អង្គការយូណេស្កូ និងការិយាល័យជាច្រើនទៀតនៅក្នុងពិភពលោកហើយPanasonic នឹងផ្តល់បច្ចេកវិទ្យា3D ទំនើបចុងក្រោយបំផុតសម្រាប់ដំណើរការថតភាពអស្ចារ្យនៅតំបន់ បេតិកភណ្ឌនានា។ ក្រៅពីនោះ ក៏មានកម្មវិធីប្រឡងស្នាដៃគំនូររបស់កុមារមកពី៥១ប្រទេសពាក់ព័ន្ធ ទៅនឹងសម្បត្តិបេតិកភណ្ឌនេះផងដែរ។
លោកស្រី Irina Bokova អគ្គនាយក យូណេស្កូ បានមានប្រសាសន៍ថា៖«យើងបានដឹកនាំគំនិតផ្តួចផ្តើមដែលទទួលបាន ជោគជ័យនានា ដូចជា កម្មវិធីប្រកួតប្រជែងគំនូរទិន្នានុលេខស្តីពីបរិស្ថាន ដែលមានប្រទេសចំនួន៥១ និងកុមារចំនួន៣០០.០០០ នាក់បាន ចូលរួម កម្មវិធីសិក្សាអំពីបរិស្ថាននៃបេតិកភណ្ឌពិភពលោក នៅក្នុងទីតាំងបេតិកភណ្ឌពិភពលោកចំនួន១១ កម្មវិធីពិសេសរបស់ទូរទស្សន៍ National Geographic Channel កម្មវិធីពិព័រណ៍ពហុអេក្រង់3D»។
លោកស្រីបន្តថា៖«មិនតែប៉ុណ្ណោះ ក្រុមហ៊ុនPanasonic បានបរិច្ចាគឧបករណ៍សោតចក្ខុទស្សន៍ទំនើបដល់ស្ទូឌីយោរបស់អង្គការ យូណេស្កូនៅទីក្រុងប៉ារីស អាតឌិស អាបាបា និងទីក្រុងបាងកកជាការវិភាគទានជាសម្ភារ ដើម្បីជួយសម្រួលដល់ការងារប្រចាំថ្ងៃ…»។
មន្ត្រីអង្គការយូណេស្កូ បានបន្តថា ក្រុមហ៊ុន Panasonic កំពុងធ្វើការនៅលើយុទ្ធនាការនៅទូទាំងពិភពលោក ជាមួយការលើកកម្ពស់សម្បត្តិបេតិកភណ្ឌពិភពលោក តាមរយៈការរួមបញ្ចូលគ្នា នៃពាណិជ្ជកម្ម តាមកញ្ចក់ទូរទស្សន៍ និងប្រព័ន្ធផ្សព្វផ្សាយបោះពុម្ពដែលបានឆ្លុះបញ្ចាំងពីការចាប់ អារម្មណ៍ និងការព្រួយបារម្ភរបស់ខ្លួន ទាក់ទងនឹងការប្រែប្រួលអាកាសធាតុ ការកែច្នៃ ការប្រើប្រាស់ទឹកឡើងវិញ ការដាំដើមឈើ និងការអប់រំ នាពេលអនាគតជាដើម។
នៅក្នុងសន្និសីទសារព័ត៌មានក្នុងពិធីចុះហត្ថលេខាបន្តភាពជាដៃគូ យុទ្ធសាស្ត្រជាមួយនឹងអង្គការយូណេស្កួ លោក Takumi Kajisha នាយកគ្រប់គ្រងជាន់ខ្ពស់របស់ Panasonic បានមានប្រសាសន៍ថា៖«កាលពី២ឆ្នាំកន្លងផុតទៅ ក្រោយចាប់ភាពជាដៃគូក្នុងឆ្នាំ២០១១ ក្នុងការប្តេជ្ញាចិត្តអភិរក្សបរិស្ថាននិងបេតិកភណ្ឌពិភពលោកសម្រាប់ មនុស្សជំនាន់ក្រោយមក សកម្មភាពជាច្រើនត្រូវអនុវត្តនិងទទួលបានលទ្ធផលដ៏អស្ចារ្យប្រកប ដោយភាពរឹងមាំ»។
លោកបានបញ្ជាក់ថា៖«តាមរយៈភាពជាដៃគូដ៏រឹងមាំនេះ យើងនឹងបន្តរួមចំណែកបន្ថែមទៀតនៅក្នុងសង្គមរបស់ពិភពលោកទាំងមូល»៕
No comments:
Post a Comment