លោក ស៊ូប៊ែឌី នឹងប្រាប់ពីលទ្ធផលបេសកកម្មលើកទី១០ នៅរសៀលថ្ងៃព្រហស្បតិ៍នេះ
ដោយ៖ ស៊ុន ណារិនថ្ងៃព្រហស្បតិ៍ ទី16 ខែមករា ឆ្នាំ2014
http://vodhotnews.com
លោក សុរិយា ស៊ូប៊ែឌី អ្នករាយការណ៍ពិសេសរបស់អង្គការសហប្រជាជាតិ ក្នុងសន្និសិទ្ធថ្ងៃទី០១ ខែសីហា ឆ្នាំ២០១៣(រូបភាពដោយ ពេជ្រ សុធារី)
សេចក្តីប្រកាសព័ត៌មានរបស់ការិយាល័យនៃឧត្តមស្នងការទទួលបន្ទុក សិទ្ធិមនុស្សប្រចាំកម្ពុជា ឲ្យដឹងថា លោក ស៊ូប៊ែឌី នឹងធ្វើសន្និសីទព័ត៌មានទាក់ទងនឹងដំណើរទស្សនកិច្ច៥ថ្ងៃរបស់លោក នៅរសៀលម៉ោង១និង៣០នាទីនេះ នៅការិយាល័យរបស់ស្នងការ។ លោក ស៊ូប៊ែឌី នឹងបង្ហាញពីការការសង្កេតរបស់លោក ដែលនឹងត្រូវដាក់ក្នុងរបាយការណ៍របស់ក្រមប្រឹក្សាសិទ្ធិមនុស្សក្នុង ខែកញ្ញាឆ្នាំ២០១៤។
អ្នករាយការណ៍ពិសេសរបស់ អង្គការសហប្រជាជាតិ លោក សុរិយា ស៊ូប៊ែឌី កាលពីថ្ងៃពុធ បានជួបជាមួយមន្ត្រីជាន់ខ្ពស់រដ្ឋាភិបាលសំខាន់ៗច្រើនទៀត ក្រៅពីលោកនាយករដ្ឋមន្ត្រី ហ៊ុន សែន ដែលមានភាពខុសប្លែកពីដំណើរទស្សនកិច្ចមុនៗ ដោយលោក មិនបានជួបជាមួយលោកហ៊ុន សែន និងរងការរិះគន់ជាបន្តបន្ទាប់លើរបាយការណ៍របស់លោក។
មន្ត្រីមួយរូបនៅឧត្ដមស្នងការ អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោក Ben Rutledge ឲ្យដឹងថា លោក ស៊ូប៊ែឌី បានជួបជាមួយលោក សុខ អាន រដ្ឋមន្ត្រីទីស្តីការគណៈរដ្ឋមន្ត្រី លោក ស ខេង រដ្ឋមន្ត្រីក្រសួងមហាផ្ទៃ លោក ហោ ណាំហុង រដ្ឋមន្ត្រីក្រសួងការបរទេស លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ និងលោក ឱម យិនទៀង ប្រធានគណកម្មាធិការសិទ្ធិមនុស្សកម្ពុជា។លោកបន្តថា លោក ស៊ូប៊ែឌី បានពិភាក្សាបញ្ហាជាច្រើនទាក់ទងនឹងបញ្ហាសិទ្ធិមនុស្សនៅកម្ពុជា រួមមានការបង្កើតស្ថាប័នសិទ្ធិមនុស្សជាតិឯករាជ្យមួយ បញ្ហាចាប់ខ្លួនមនុស្ស២៣នាក់ កាលពីថ្ងៃទី០២ និងទី០៣ ខែមករា ពេលផ្ទុះហិង្សាជាមួយកម្លាំងសមត្ថកិច្ច គម្រោងដោះស្រាយស្ថានភាពនយោបាយនៅកម្ពុជា គម្រោងកំណែទម្រង់មូលដ្ឋាន រួមមានកំណែទម្រង់ការបោះឆ្នោត និងតុលាការ ការលុបបំបាត់អំពើពុករលួយ បម្រាមលើបាតុកម្ម និងការពិនិត្យលើប្រាក់ឈ្នួលកម្មករឡើងវិញ។ លោកហៅជំនួបនោះថា មានលក្ខណៈស្មោះត្រង់ យោគយល់ និងលម្អិតពិស្តារ។
គួរបញ្ជាក់ថា លោក សុរិយា ស៊ូប៊ែឌី បានមកដល់កម្ពុជាកាលពីថ្ងៃទី១២ ខែមករា និងចាកចេញពីកម្ពុជាវិញនៅថ្ងៃទី១៨ ខែមករា ឆ្នាំ២០១៤៕
សរសេរមកកាន់ លោក ស៊ុន ណារិន តាមរយៈsun_narin@vodhotnews.com
No comments:
Post a Comment