លោក ស៊ូប៊ែឌី៖ UN នឹងធ្វើជាអ្នកសម្របសម្រួល ប្រសិនបើគណបក្សទាំងពីរ ស្នើសុំ
ដោយ៖ ស៊ុន ណារិនថ្ងៃព្រហស្បតិ៍ ទី16 ខែមករា ឆ្នាំ2014
http://vodhotnews.com
លោក ស៊ូប៊ែឌី ក្នុងសន្និសីទសារព័ត៌មាននៅរសៀលថ្ងៃព្រហស្បតិ៍នេះ (រូបថត តាត ឧត្តម)
អ្នករាយការណ៍ពិសេសអង្គការសហប្រជាជាតិ
ទទួលបន្ទុកសិទ្ធិមនុស្ស លោក សុរិយា ស៊ូប៊ែឌី នៅថ្ងៃព្រហស្បតិ៍នេះ
ថ្លែងថា សហគមន៍អន្តរជាតិ ក៏ដូចជាអង្គការសហប្រជាជាតិ
នឹងធ្វើជាអ្នកសម្របសម្រួលនយោបាយនៅកម្ពុជា
ប្រសិនបើមានការស្នើសុំពីភាគីទាំងពីរ គឺគណបក្សប្រជាជនកម្ពុជា
និងគណបក្សសង្គ្រោះជាតិ។
ក្នុងសន្និសីទសារព័ត៌មាននៅរសៀលថ្ងៃ
ព្រហស្បតិ៍នេះ លោក ស៊ូប៊ែឌី មានប្រសាសន៍ថា ប្រសិនបើភាគី
គណបក្សនយោបាយទាំងពីរ ស្នើទៅអង្គការសហប្រជាជាតិ
សម្រាប់ជំនួយជាអាជ្ញាកណ្តាល នោះ
លោកនឹងយកទៅពិចារណាយ៉ាងយកចិត្តទុកដាក់។ លោកបញ្ជាក់ថា អ្វីៗ
គឺអាស្រ័យលើការចរចាបស់គណបក្សទាំងពីរ ថាតើអ្វីដែលល្អបំផុត
និងអាចជាប្រយោជន៍សម្រាប់ជាតិ។ លោកបន្តថា អ្វីៗ
អាស្រ័យតាមរយៈការផ្សះផ្សារ និងការចរចារវាងគណបក្សនយោបាយ។
ប្រធានគណបក្សសង្គ្រោះជាតិ លោក សម
រង្ស៊ី នៅថ្ងៃព្រហស្បតិ៍នេះ ប្រកាសថា
បេក្ខជនជាប់ឆ្នោតជាតំណាងរាស្ត្រគណបក្សសង្គ្រោះជាតិ
អាចចូលរួមប្រជុំសភាបាន
ប្រសិនបើមានការធានាកំណែទម្រង់ប្រព័ន្ធបោះឆ្នោត
សម្រាប់ការបោះឆ្នោតឡើងវិញ។
លោក សម រង្ស៊ី
បានសរសេរនៅលើហ្វេសប៊ុករបស់លោកថា គណបក្សសង្គ្រោះជាតិ
ស្វាគមន៍តួនាទីរបស់អង្គការសហប្រជាជាតិ ដើម្បីដោះស្រាយវិបត្តិនយោបាយ
ក្រោយការបោះឆ្នោត។
លោកបញ្ជាក់ថា៖«ប៉ុន្តែការចូលរួមប្រជុំរដ្ឋសភាអាចធ្វើទៅបាន
លុះត្រាតែមានការធានាឲ្យមានការកែទម្រង់ប្រព័ន្ធ
បោះឆ្នោត(មុនគេផ្លាស់ គ.ជ.ប.)
ដើម្បីឈានទៅរកការបោះឆ្នោតឡើងវិញក្នុងពេលឆាប់ៗនេះ»។
លោកនាយករដ្ឋមន្ត្រី ហ៊ុន សែន
កាលពីថ្ងៃពុធ បានស្នើឲ្យអ្នករាយការណ៍ពិសេសអង្គការសហប្រជាជាតិ
ទទួលបន្ទុកសិទ្ធិមនុស្ស លោក សុរិយា ស៊ូប៊ែឌី
ជួយឲ្យតំណាងរាស្ត្រគណបក្សសង្គ្រោះជាតិ ចូលសភាជាមុនសិន
ដើម្បីជាការឈានដល់ការទម្លាយភាពទ័លច្រកនានា។
VOD មិនទាន់ទាក់ទងមន្ត្រីគណបក្សប្រជាជនកម្ពុជា ដើម្បីអត្ថាធិប្បាយលើបញ្ហានេះបាននៅឡើយទេ៕
No comments:
Post a Comment